நீட் - மலரும் நினைவுகள்

# நீட் #

நீட் தேர்வு அன்று முழுவதும் செய்திகளில் எர்ணாகுளம் சம்பவம்..

12 வருஷத்துக்கு முன்னாடி இதே போல நானும் அப்பாவும் ஒரு எக்ஸாம் எழுத வந்தது தான் ஞாபகத்துக்கு வந்தது.
இப்போ எர்ணாகுளத்தில் இருக்கிறேன்.  அப்போ நான் திருவனந்தபுரத்தில் வேலை பார்த்துட்டு இருந்தேன். என் சொந்த ஊரான ஸ்ரீவில்லிப்புத்தூர்ல இருந்து அப்பா திருவனந்தபுரத்துக்கு எக்ஸாமுக்கு முந்தின நாளான சனிக்கிழமை வந்து என்னை அழைச்சிக்கிட்டு எர்ணாகுளத்துக்கு வந்தாங்க. மொத்தமா 12 மணி நேரம் பயணம் அவங்களுக்கு. திருவனந்தபுரத்துக்கு பஸ்ல வந்து இறங்கி என்னை ஹாஸ்டலில் இருந்து கூட்டிக்கொண்டு போனாங்க.
‌  மாலை 4 மணிக்கு ட்ரையின்ல ஏறி இரவு 8.30க்கு வந்து சவுத் ஸ்டேஷன்ல இறங்கினா செம மழை...புது இடம் . லாட்ஜ் தேடி மழையில போனோம். எனக்கு ஒரே பயம்.  ராத்திரி முழுவதும் தூக்கமே வரல.  மறுநாள் ஞாயிற்றுக்கிழமை காலையில் எந்திரிச்சு ஆட்டோ பிடிச்சு போய் எக்ஸாம் எழுதிட்டு மத்தியானமே கெளம்பியாச்சு.  திரும்ப என்னை திருவனந்தபுரத்தில் விட்டுட்டு அன்னைக்கு ராத்திரியே அப்பா பஸ்ல ஸ்ரீவில்லிப்புத்தூர்க்கு போய் சேர்ந்துட்டாங்க. இப்ப நடந்தது போல இருக்கு எல்லாம்.
‌நேத்து ராத்திரி அதே மாதிரி தான் இங்க செம மழை.  எனக்கு இருந்த மாதிரி தான் நிறைய பேருக்கு பயம்கலந்த உணர்வுகள் இருந்திருக்கும். நேத்து சாயங்காலம் இருந்து இதே நினைவுகள்ல தான் இருக்கிறேன். நேற்று , இன்னைக்கெல்லாம் நீட் எழுத வந்தவர்களுக்கு நிறைய பேர் உதவி பண்ணினாங்க. தங்க இடம், உணவு , ஆட்டோ வசதி எல்லாம் செய்து கொடுத்திருக்காங்க. எக்ஸாம் சென்டருக்கு போக எல்லாம் ஏற்பாடு செய்து உதவி பண்ணிருக்காங்க.
‌அவர்களுக்கெல்லாம் நன்றி...

மெரைன் டிரைவ் (Marine drive)- கொச்சி

பயணக் கட்டுரை

மெரைன் டிரைவ் - கொச்சி

கொச்சிக்கு நாங்கள் வந்து ஒன்றரை வருடங்களாகிறது. இங்கு வந்ததும் முதலில் நாங்கள் பார்க்கச் சென்ற இடம் மெரைன் டிரைவ் (Marine drive). இது கொச்சியின் சுற்றுலா தளங்களில் மிக முக்கியமான ஒன்று. பல திரைப்படங்களில் இதைக் காணலாம். இதேபோல (Marine drive - Queens necklace)மும்பையிலும் உள்ளதாகக் கேள்விப்பட்டுள்ளேன் . அது அரபிக் கடற்கரையைச் சுற்றி அமைந்துள்ளது.

கொச்சியிலுள்ள இந்த மெரைன் டிரைவ்,  வேம்பநாடு என்ற ஏரி கடலில் கலக்கும் இடத்தில் அமைந்துள்ளது.    இந்த இடத்தில் ஏகப்பட்ட கடைகளும் ஷாப்பிங் மால்களும் அமைந்துள்ளன. இங்கு சூரியன் மறைவது கண்கொள்ளாக் காட்சியாக இருக்கும்.

இந்த ஏரியின் ஒரு பகுதி இந்தியக் கப்பற்படை மற்றும் துறைமுகத்தின்  கட்டுப்பாட்டில் உள்ளது.  மற்ற பகுதியில் படகுப் போக்குவரத்து நடைபெறுகிறது. சுற்றுலா பயணிகளுக்காக தனியாருக்கு சொந்தமான படகுகளும் அரசாங்கமே நடத்தும் 'ஜெட்டி' (jetty ) எனப்படும் படகுப் போக்குவரத்தும் உள்ளது. தனியார் படகுகளில் சுற்றிப் பார்க்க கட்டணமாக ஒரு நபருக்கு குறைந்தது 100 ரூபாய் வசூலிக்கிறார்கள்.  படகின் அளவைப் பொறுத்து 20 முதல் 50 நபர்கள் வரை உட்காரலாம் .இதில் ஏறி உட்கார்ந்தால் ஒரு மணி நேரம் படகில் பயணம். வழிகாட்டியும் கூட வந்து அங்குள்ள இடங்களைப் பற்றி விளக்குகிறார்.

அரசாங்க ஜெட்டியில் ஒரு நபருக்கு 4ரூபாய் வசூலிக்கிறார்கள்.  அரைமணி நேரத்திற்கு ஒரு படகு கிளம்புகிறது. இது மெரைன் டிரைவில் இருந்து  ஃபோர்ட் கொச்சி, மட்டஞ்செர்ரி, வைப்பின் என்ற மூன்று இடங்களுக்கும் செல்கிறது. வேலைக்கு தினமும் சென்று வருவோருக்கு இந்த ஜெட்டி படகுப் போக்குவரத்து மிகவும் பயன்படுகிறது. சுமார் 20 கிமீ சாலைவழி பயணத்தை நான்கு ரூபாயில் 20 நிமிடத்தில் அடைந்துவிடலாம். அனைத்து படகுகளிலும் பயணிகளின் பாதுகாப்பிற்காக உயிர்காக்கும் மிதவை ஆடைகளும் ( life jacket ) வழங்கப்படுகின்றன. எனவே அனைத்து மக்களின் விருப்பமும் இந்தப் படகு போக்குவரத்தாகவே உள்ளது. 

இத்தகைய இயற்கை எழில்மிகு படகுப் பயணத்திற்கு எல்லோரும் வாங்க கொச்சி மெரைன் டிரைவிற்கு. பள்ளிவிடுமுறை வரப்போகிறது. விடுமுறையை இயற்கையுடன் கழியுங்கள் ....அனுபவித்து மகிழுங்கள்.

மீண்டும்.....

             கிட்டத்தட்ட மூன்று வருடங்களுக்குப் பிறகு மீண்டும் வலைப்பூவிற்கு வந்திருக்கிறேன். இடையில் பல மாற்றங்கள்.... இட மாற்றங்கள்.
ஆனாலும் அவ்வப்போது பல பதிவர்களின் பக்கங்களை படித்துக் கொண்டுதான் இருந்தேன்.  சிலர் தொடர்ந்து நன்றாக எழுதிக் கொண்டு இருக்கின்றனர். பலர் முகப்புத்தகத்தின் ஈர்ப்பினால் அதில் எழுதி வருகின்றனர். சிலர் ஜி + ல் எழுதுகின்றனர். எழுத்து ஏதேனும் ஒரு வகையில் தொடர்ந்து கொண்டு தான் இருக்கிறது. பலருடைய எழுத்துக்களை புத்தகங்களிலும் புத்தகங்களாகவும் பார்க்கிறேன். மகிழ்ச்சியாக உள்ளது.
இனியாவது தொடர்ந்து ஏதேனும் உருப்படியாக எழுதலாம் என நினைக்கிறேன். உங்களின் ஆதரவோடு...